– چریکه‌ی نێو قه‌فه‌ز –
چریکه‌ی نێو قه‌فه‌ز
هه‌موو شه‌وێ
له ئه‌ودیوی دیواره‌وه
باڵنده‌ێکی دیلی قه‌فه‌ز، تێی ده‌چریکاند!
به‌سته‌کانی
ڕووداوانی نیشتمانی خوێن و ئاگر و هه‌ڵمه‌ت بوون
لاوک، حه‌یران، سیاوچه‌مانه‌ی
ئه‌کرد به پرد
هه‌ڵگورد ده‌ستی شاهۆی ئه‌گرت
له‌گه‌ڵ قه‌ندیل، به سه‌ر پردا
بۆ لای چیای ئاگری ئه‌چوون!
هه‌مو شه‌وێ
منیش له پشت ده‌لاقه‌ی ژوره‌که‌مه‌وه
زنجیری دیلیم ده‌پساند و
ئه‌سپی خه‌یاڵم زین ئه‌کرد
به شاڕێگه‌ی حه‌نجه‌ره‌ی ئه‌و باڵنده‌دا
بۆ نیشتمان ئه‌چوومه‌وه
دوێنێ شه‌وێ
شه‌وبۆنی خه‌م، بۆنی ماته‌می لێ ئه‌هات
تا به‌یانی چاوه‌ڕوان بووم
ده‌نگی باڵنده‌که نه‌هات
ئه‌وڕۆ بیستم
له کازێوه‌ی سپێده‌دا
باڵنده ده‌نگ‌خۆشه‌که‌یان سه‌ر بڕیوه
بۆ تێکدانی بنکه‌ی سووری به‌سته‌کانی
ڕە‌گ به ڕە‌گی حه‌نجه‌ره‌یان هه‌ڵدڕیوه
ئیمشه‌و دڵم ده‌کورکێنێ
باڵنده‌یه‌کی باڵ و په‌ل و پۆ خوێناوی
له سه‌ر لقی شیعرێکی پڕ تاسه و هێشتا نه‌گوتراوم
هه‌ڵنیشتووه و ده‌چریکێنێ!
24/4/1371 – July 15, 1992
جەلال مەلەکشا - جلال ملکشا - Jalal Malaksha
