– عه‌شقێکی پاوان –
عه‌شقێکی پاوان
کچێکم خۆش ده‌وێ
وه‌ک په‌ڕە‌ی گوڵ وایه!
هێند جوان و ناسکه
هێند شیرین
که ده‌ڵێی ده‌ستکردی تایبه‌تی خودایه!
وه‌ک په‌ری،
ده‌ستی لێ وه‌شاندووم
هه‌ربۆیه شێت بوومه و
نازانم چی بکه‌م
به‌م دڵه شه‌یدایه!
جار جارێ
به لاما راده‌برێ
بزه‌یه‌ک وه‌ک گوڵووک
له‌سه‌ر لێو
هه‌زاران ڕازیش له نیگایه!
نه دوورین، نه نزیک
نێوانمان هه‌ر ته‌نیا
دیوارێک مه‌ودایه!
شه‌وانه من ته‌نیام
ئه‌ویش له ژووره‌که‌ی ته‌نیایه
هه‌ناسه و خورپه‌ی دڵ یه‌کتر ده‌بیسین!
ئه‌زانم، من چه‌نده دڵخوازم
ئه‌ویش وه‌ک من وایه!
به‌ڵام ئاخ!
ئه‌و مانگی یه‌که‌می به‌هاره
من مانگی کۆتایی زستانم
دوو هێڵی ته‌ریبین
قه‌د ناگه‌ین به یه‌کتر
هه‌ر چه‌ند زۆر له یه‌کتر نزیکین!
هه‌ولێر
30/2/1379 – May 20, 1991
جەلال مەلەکشا - جلال ملکشا - Jalal Malaksha
