– بۆ کاوه، شاهۆ، نیما –
بۆ کاوه، شاهۆ، نیما
ئه‌ی کاوه گیان!
له مێژ ساڵه
زوحاک به سه‌رمانا زاڵه
باده‌ی جامی ماره‌کانی
خوێنی لاوی کرچ‌و‌کاڵه!
ئه‌ی شاهۆ گیان!
چیا ده‌بێ، له ده‌روونیا
بچریکێنێ لووله‌ی تفه‌نگ
ئه‌وینداران بۆ ئازادی
له سه‌ر دوندی
بڵێن قام و به‌سته و ئاهه‌نگ
کاوه‌ی دلێر
بۆ ڕاپه‌رین چیای ئه‌وێ
بۆ حه‌سان و پاڵ پێوه‌دان
قه‌ڵای ئه‌وێ!
ئه‌ی نیما گیان!
په‌لکه‌ی کچی هیواکانم بهۆنه‌وه
وشه یاخییه بێ‌لانه‌کان
ده‌سته‌مۆ که، وێنه‌ی فیشه‌ک
شیعرێک بڵێ بۆ هه‌ژاران ببێ به چه‌ک
شاهۆ، کاوه!
من به‌ڵێنم به گه‌ل داوه
حه‌ماسه‌یه‌ک بخوڵقێنین
نیما بیکا به هۆنراوه!
20/1/1368 – April 8, 1989
جەلال مەلەکشا - جلال ملکشا - Jalal Malaksha
