– چاو خڵه‌تێنه –
چاو خڵه‌تێنه
هۆ خه‌ڵکینه!
چاو که‌نه‌وه
ئه‌و هه‌ورانه
هه‌رچه‌ند سه‌ر له ئاسمان ئه‌سوێن
قسرن، بارانیان پێ نییه
تۆزێ به‌ر پێی
ئه‌سپی له‌شکه‌ری هۆلاکۆن!
بڕوا مه‌که‌ن…
هه‌رچه‌ند له ئاو
له باران و به‌هار ئه‌دوێن
بڕوا مه‌که‌ن…
ته‌م و مژی چاوخڵه‌تێنه‌ی به‌ری ئاسۆن
کێلگه تینوو
هه‌ور نه‌زۆک
ده‌ریاش سوێره!
ڕێگه دوور و
ئاو تراویلکه
چاوساغ کوێره
شه‌و درێژە
ئه‌نگوسته‌‌چاوی نووته‌که
گه‌رده‌لووله، ته‌مه، مژە
چاو تا به‌ر پێ، هه‌ته‌ر ناکا
ئه‌و ئه‌ستێره هانمان ده‌دا
کاروانکوژە!
4/7/1370 – September 26, 1991
جەلال مەلەکشا - جلال ملکشا - Jalal Malaksha
