– هه‌ڵه‌بجه –
هه‌ڵه‌بجه
هه‌ڵه‌بجه،
زا‌مێکی ناسۆره
هه‌ر زووخی لێ ئه‌تکێ
ئه‌ڕژێته ناو گۆمی خنکاوی ویژدانی سه‌ده‌ی بیست!
هاواری هه‌ڵه‌بجه
ئاسمانی ڕاچڵه‌کاند
خوا تف و له‌عنه‌تی له سیمای زه‌وی کرد.
موویه‌ک له لاشه‌ی ئه‌م ده‌عبایه نه‌بزووت.
دنیای که‌ڕ، هاواری پێنج هه‌زار په‌پووله‌ی
دیلی نێو دۆزه‌خی شه‌یتانی هه‌ر نه‌بیست!
له مێژوو بپرسن
نه‌ورۆزی کام وڵات
ئاوری کۆگای قژ، بسکی خاو…
ژیله‌مۆی برژانگی چاوی جوان
کاکۆڵ و په‌رچه‌می منداڵی ساوایه!
ئه‌مه نه ئاکامی ئاکاری خۆمانه و
نه ده‌ستی چاره‌نووس
یاسای ده‌ستکردی به‌دخواکانی زه‌وینه.
له ئاسمان بپرسن
زه‌وینی پڕ تاوان
به‌ستێنی جه‌ولانی کام خوایه!
هه‌ڵه‌بجه!
هاواری ئینسانه
ئینسانی بێ‌په‌نا و ته‌نیای ئه‌م زه‌مانه
وه‌ک ڕە‌وه‌ئاسکێکه، بێ‌داڵده
له هه‌موو لایێکه‌وه ده‌ستڕێژی لێ ئه‌که‌ن
بۆ هه‌ر لا ڕوو ده‌کا هه‌ر ته‌ڵه و هه‌ر داوه!
هه‌ڵه‌بجه، شکاتی گه‌لێکه
وڵات به وڵات و شار به شار ده‌یگێڕم
نازانم له کامه دادگای عادڵدا، وه‌ک تفێک
ته‌ژی له نه‌فره‌ت و ڕق و قین
هه‌ڵیداوێمه نێو چاوانی ئه‌م قه‌ڕنه به‌دناوه!
12/1368 – February, 1990
جەلال مەلەکشا - جلال ملکشا - Jalal Malaksha
