– بانگم ده‌که‌ن –
بانگم ده‌که‌ن
به‌رله مێژووی ته‌قینه‌وه‌ی ئه‌م جیهانه
ئاسمانی پیر
ئه‌فسانه‌ی داهاتووی زه‌وینی
به گوێی گه‌ردوونا ئه‌چرپاند
په‌ڵه‌هه‌ورێکی چه‌واشه،
دڵی پڕ بوو!
من دڵۆپێ له‌و گریانه‌م
که له چاوی هه‌ور تکاوم
ڕۆڵه‌ی ئاواره‌ی زریانم
له سیلسله‌ی ڕۆحی ئاوم!
ته‌نیا و غه‌ریب
نیشتمانم به قه‌د مه‌ودای مه‌رگ و ژیان، له من دووره
به زنجیری ته‌مه‌ن له ئه‌م گۆڕخانه‌دا دیل کراوم!
هاوار ئه‌که‌م
تاسه‌یه‌کی لێو شه‌قارم
تینوو، تینوو، له‌م که‌ویره به‌جێ ماوم!
بۆ سه‌رچاوه‌م بگێڕنه‌وه
له‌م وڵاته نامۆیه‌دا
وه‌ک تۆپێکی شڕ و شیتاڵ
وه‌به‌ر لاق و شه‌قی چاره‌نووس دراوم!
ڕۆحم له ناو ڕکه‌ی له‌شما ئه‌زریکێنێ
ئه‌م باڵنده باڵ‌شکاوه
بیره‌وه‌ری ئاسمانی به‌رز، په‌ڕپه‌ڕۆچکه و…
ته‌قڵه‌بازیی ساماڵی خوای هه‌رگیز له بیر ناچێته‌وه!
بانگم ده‌که‌ن
گوێ ڕادێرن، بانگم ده‌که‌ن!
زه‌ریا، شه‌پۆلی چه‌واشه
هه‌ور، دڵۆپی ئاواره
ئاسمان، باڵنده‌ی ئه‌سیر و
منیش یه‌کێ بانگم ده‌کا
ده‌نگی پێ دێ، ده‌نگی پێ دێ.
زایه‌ڵه‌ی ده‌نگی پێی مه‌رگه، له داڵانی دڵمه‌وه دێ
هه‌نگاو، هه‌نگاو، نێزیک گیانم ده‌بێته‌وه!
ورمێ
5/4/1375- June 25, 1996
جەلال مەلەکشا - جلال ملکشا - Jalal Malaksha
