– شه‌هید –
شه‌هید
کاتێ زانیان،
دڵت پاپۆڕی ئه‌وینه و
بۆ گه‌یشتن به به‌نده‌ری خۆشه‌ویستی
ده‌ریای شه‌خته و سه‌هۆڵ ئه‌بڕي
هاتن سینگتیان هه‌ڵدڕی!
کاتێ زانیان،
دڵت پردێکه پان و پۆڕ
به‌ره‌و ناخی مێژووی جیهان
ده‌ستی کوێستانت گرتووه و
له قووڵایی مه‌رگ و خوێنا
ئه‌یبه‌ی به‌ره‌و کۆشکی ژیان
په‌رده‌ی وه‌رزی زریان ئه‌دڕی
هاتن سینگتیان هه‌ڵدڕی!
کاتێ زانیان،
بورکانه دامرکاوه‌کان ئه‌خرۆشێنی
بوومه‌له‌رزه خنکاوه‌کان
له ناو خوێنتا ئه‌جوێنه‌وه
نه‌خشه‌ی جیهان ئه‌شێوێنی
سنوره‌کان له ژێر پێتا ئه‌توێنه‌وه
وه‌ک بڵێسه‌ی کڵپه‌ی ئاگر
له ناو شه‌وه‌زه‌نگا ئه‌گڕی
هاتن سینگتیان هه‌ڵدڕی!
کاتێ زانیان،
ناوت بووه به جوانترین وشه‌ی ئه‌وین
دڵداره‌کان ده‌بزوێنی
ده‌نگت بووه به چه‌پکه تیشک
شه‌وی چڵکن ئه‌شڵه‌قێنی
شانت داوه به ژێر خه‌می نیشتمانا و
فرمێسک له چاو هه‌ژار ئه‌سڕی
هاتن سنگتیان هه‌ڵدڕی!
کاتێ زانیان،
کوێستانت کردووه هێلانه و
به شمشاڵی لووله‌ی تفه‌نگ
ئه‌وینداران بۆ جێژوانی چیا ئه‌چڕی
هاتن سينگتیان هه‌ڵدڕی!
هاتن سينگتیان هه‌ڵدڕی!
1368 – 1989
جەلال مەلەکشا - جلال ملکشا - Jalal Malaksha
