– تفه‌نگ و خوێن و چیا –
تفه‌نگ و خوێن و چیا
بۆ شێرکۆ بێکه‌س
وتیان: کاکه!
وشه‌ی تفه‌نگ
ڕەقه، زه‌قه، ناهه‌مواره
به‌رهه‌ڵستی گه‌شه و نه‌شه‌ی شیعره‌کانته
شانی شیعرت
به‌و بۆنه‌وه برینداره!
ئه‌ی من چ بکه‌م؟
نه‌خشه‌ی گه‌وره‌ی وڵاته‌که‌م
تفه‌نگێکه و
بتانه‌وێ و نه‌تانه‌وێ
له ناو هه‌موو نووسراوه‌کانمدا دیاره!
وتیان: چیا زۆر سه‌رکه‌شه
له ناو شیعرێکی په‌سه‌ند و ڕێک‌وپێکدا
ناشرینه قوت بێته‌وه
ئه‌ی من چ بکه‌م؟
نیشتمانم کوێستانێکه و
هه‌رچه‌ند ئه‌که‌م
وشه‌ی چیا
له ناو دێڕ و کرت و ڕستی شیعره‌کانما ناچێته‌وه!
وتیان: ئه‌ی خوێن!
خۆ ئیتر خوێن
پێویست ناکا
له ناو شیعرا خۆی بنوێنێ
ئه‌ی من چ بکه‌م؟
نیشتمانم ده‌ریای خوێنه
ڕە‌نگی خوێن له دڵۆپی خوێن بسڕمه‌وه
چی ده‌مێنێ؟
بتانه‌وێ و نه‌تانه‌وێ
وشه‌ی شیعری من هه‌ر خوێنه.
پێتان ده‌ڵێم
شاعیرانی وڵاته‌که‌م، پێتان ده‌ڵێم
سه‌ری شیعری بێ‌چه‌ک ده‌بڕن
شیعری بێ‌خوێن
زه‌رد و بێ‌هێز و لاوازه
شیعرێ چیای تێدا نه‌بێ
زگی ده‌دڕن!
پێتان ده‌ڵێم
بۆیه شیعرم خوێناويیه و
سووره ڕه‌نگم
من شاعیری نیشتمانی خوێن و کوێستان و تفه‌نگم!
22/11/1368 – February 11, 1990
جەلال مەلەکشا - جلال ملکشا - Jalal Malaksha
