– ھێلانەی من… –

ھێلانەی من…

 

 

-١-

 

ھۆ کیژۆڵە قژ سەوزەکەی دارستانی ھەست و شیعرم

چۆن بێمەوە؟

ئەم گێژاوە دەمخنکێنێ

لەم لێمشتە سامناکە چۆن بپەڕمەوە؟!

 

گەر بتەوێ

دڵت ئەکەی بە پردێک و

نەک ھەر لافاو

شەپۆلی گشت زەریانەکانیش لەغاو ئەکەی

کە ھاتیەوە

عارەقەی نێو چاوانت بە قژ و کەزی ئەسڕمەوە!

 

 

-٢-

 

ھۆ کیژۆڵە قژ سەوزەکەی دارستانی ھەست و شیعرم

چۆن بێمەوە؟!

لە نێوانی من و تۆدا

شمشێرێکە و

خوێنی ھەزار ئەوینداری لێ‌دەچۆڕێ

 

شمشێر کولە و ئەوین تێژە

بە بڵێسەی ئاگری دڵ

ئەم شمشێرە بتوێنەوە

ئەوینداری ڕاستەقینە

لە بەرامبەر ھیچ کۆسپێکا

دڵ ناگۆڕێ

 

 

-٣-

 

ھۆ کیژۆڵە قژ سەوزەکەی دارستانی ھەست و شیعرم

چۆن بێمەوە؟!

تا چاو بڕ کات

ھەر بڵێسە و کڵپەی ئاگر

بەرەو ئاسمان ھەڵئەچێت و

دووکەڵ دنیای داپۆشیوە

دڵم نەماوە حەجمێنی

 

ئاگر بە ئاو دائەمرکێ

دەبێ لە کوورەی ئەوینا

ببێ بە ئاو

بەرەو ئاسمان ھەڵکێشیت و

وەک ھەور بەسەر

چەڕە دووی ئەم گڕکانەدا، داباریت و

سینگە سووتاوەکەی من و

زەوینی خوا بخەمڵێنی

 

 

-٤-

 

ھۆ کیژۆڵە قژ سەوزەکەی دارستانی ھەست و شیعرم

چۆن بێمەوە؟!

ئا لەم شەوە کش و مات و گورگە ناوە، چەواشەم و

نازانم چۆ بتبینمەوە؟

 

گەر ئەتەوێ لەگەڵ منا ئاوێتە بیت و ھەر بژیت

گیانت بکە بە گزینگ و

سامانی شەو بسووتێنە!

بۆ ئەم ساماڵە تاریکە، ببە بە ڕۆڵەی تاقانە

ئەگەر تیری ھەوری چڵکنیش پێکاتی

ئەوسا ئیتر، دێیتەوە بۆ باوەش من و

سینگم ئەکەی بە ھێلانە!

 

٢٥/١/١٣٦٩ – April 14, 1990

جەلال مەلەکشا - جلال ملکشا - Jalal Malaksha