– گه‌مارۆ –
گه‌مارۆ
به ده‌ورما
دیواری ئاسن و پۆڵایان کێشاوه
سه‌ربان و به‌ر ده‌رکه
ته‌نانه‌ت له سه‌ر ڕێی خه‌یاڵما
چاودێریان داناوه
به‌ڵام شیعر
بۆ سه‌فه‌ر
له چاودێر ناپرسێ
ئه‌شقیای کوێستانی خه‌یاڵه و
له‌سوڵتان، له خونکار، له جه‌للاد
ناترسێ
شیعری من
هاواری ئه‌وینه و
شووره‌ی ئه‌م قه‌ڵایه کون ده‌کا
له سه‌دان ده‌رکه‌وه ڕە‌ت ده‌بێ
به‌ده‌ستی دڵداری خۆی ده‌گا!
20/6/1373 – September 11, 1994
جەلال مەلەکشا - جلال ملکشا - Jalal Malaksha
