– خه‌ون –
خه‌ون
زۆر شه‌و له خه‌و ڕاده‌چڵه‌کم
له عاره‌قه‌ی سام ده‌گه‌وزام
خه‌ونم ده‌دی…
ته‌رمی کوژراوی پیاوێکم له کۆڵ ناوه!
هه‌ر دوو ده‌ستم خوێناویيه
نه‌مده‌زانی ئه‌م بێگانه
چۆن به ده‌ستی من کوژراوه!
خه‌ونم ده‌دی
پۆلیس وه‌ک شاره‌مێرووله هه‌ڵده‌قوڵن و
ده‌ورم ده‌ده‌ن
هه‌ر دوو ده‌ستم ده‌به‌ستن و
به‌ره‌و گۆڕستانم ده‌به‌ن!
ڕامده‌کرد و
له قه‌ڵشتی زامی سینگی ته‌رمه‌که‌وه،
ڕۆ ده‌چووم و
خۆم له په‌نای ئاوارێکا ده‌شارده‌وه
هه‌ر خه‌ریک بووم
خه‌نجه‌رێکم به هه‌سانی گه‌ردنی خۆم تیژ ئه‌کرد و
خه‌نجه‌ره‌که، ده‌می نابووه
گه‌رووی ته‌رم و
له چۆڕاوه‌ی خوێنی ژینی ئه‌خوارده‌وه!
خه‌ونم ده‌دی، خه‌ونم ده‌دی
هه‌تا ڕۆژێ له‌م گۆڕەخانه گیرسامه‌وه
ئێتر ئه‌وسا تێگه‌یشتم
ئه‌و ته‌رمه هه‌ر جه‌سته‌ی خۆم بوو
که خۆم به ده‌ستی خۆم کوشتم!
27/7/1371 – October 19, 1990
جەلال مەلەکشا - جلال ملکشا - Jalal Malaksha
