– سزای دڵداری –

سزای دڵداری

 

 

زات ناکه‌م ڕازی دڵ بدرکێنم!

سه‌گی ئه‌م شاره…

لانگیره، بۆنی دڵ و ده‌م ئه‌کا

سه‌گی ئه‌م شاره…

نه‌ک ته‌نیا گۆشت و ئێسک و خوێنی دڵ

ته‌نانه‌ت شیعر و گۆرانی ئه‌خوا!

زات ناکه‌م بڵێم

چه‌ندم خۆش ئه‌وێی!

زیته‌ی چاوی گورگ

له‌م گورگه‌ناوه

زات ئه‌تۆقێنێ

له ‌سه‌رانسه‌ری ئه‌م وه‌رزه‌ تاڵ و زه‌رد و ژاکاوه

بۆ حه‌شاردانی گوڵی هه‌ستی خۆم

شک نه‌به‌م شوێنێ

زات ناکه‌م ڕازی دڵ بدرکێنم!

 

7/8/1364 – August 28, 1985

جەلال مەلەکشا - جلال ملکشا - Jalal Malaksha