– زیندانی –

زیندانی

 

 

له‌ نێو ژووره‌ تاکه‌که‌سیه ‌ته‌نگه‌که‌مدا

هه‌ڵکورماوم!

کاره‌ساتێک به‌ڕێوه‌یه

له‌ودیو دیوار

وه‌ردیانه‌که‌م ڕاوه‌ستاوه

ده‌لاقه‌یه‌کی بچکۆڵه

له ‌سه‌ر سینگی ده‌رکه‌که‌یه ‌و

داخراوه!

کۆتره‌باریکه‌ی خه‌یاڵم

تامه‌زرۆیه، هه‌ڵفڕێت تا

په‌ڕپه‌ڕۆچکه‌ی ئاسمانی کاکی‌به‌کاکی!

جاربه‌جارێ

وه‌ردیانه‌که‌م

ده‌لاقه‌که ‌ده‌کاته‌وه ‌و

لێم ده‌ڕوانێ

ئه‌و تاریکی ده‌بینێت و من ڕووناکی!

 

25/3/1371 – June 15, 1992

جەلال مەلەکشا - جلال ملکشا - Jalal Malaksha