کاروان، کاراوان

 

 

کاروان، کاروان!

کێ نوستووه، کێ بێداره؟

ئه‌م ڕێگایه ‌پێدا ده‌چن…

هه‌ر ڕێگا کۆنه‌که‌ی پاره!

ده‌ور و به‌رتان گورگه‌لووره

چه‌قه‌ڵ کاسه‌ی سه‌ر و گۆشتی دڵتان ئه‌خوات

ئه‌وه‌نده ‌تاریکی چڕە

جندۆکه‌ کۆرپه‌تان ده‌دزێ

پێ نازانن!

چاوتان له‌ ناو تاریکیدا

تا ئه‌م خواره ‌هه‌ته‌ر ناکات!

بیرتان ئاسمانێکی ته‌سکه

هێنده‌ به‌رچاوتان تاریکه

نازانن ڕۆژ له ‌ئاسۆی کام پێده‌شته‌وه!

سه‌ر هه‌ڵدێنێ.

هه‌ر به ‌ته‌شییه‌ کۆنه‌که‌تان ده‌یڕێسن و

له ‌بیری نوێ سڵ و سرکن…

هه‌ر ئه‌ڕۆن به ‌ناخی قووڵی زوڵمه‌تا ڕۆ ده‌چن!

چراکانیش کز ئه‌سووتێن

هێندێ چراش چاوی گورگن!

 

کاروان… کاروان!

هۆ کاروانی سه‌ر ‌لێشێواو

له‌ شه‌وگاری ئه‌نگوسته‌چاو

گۆچانی شک ده‌لاقه‌یه‌ک ناکاته‌وه!

مه‌شغه‌ڵ مه‌شغه‌ڵ…

مه‌شغه‌ڵی بیر

چرای ئه‌ندێشه‌تان هه‌ڵکه‌ن

ڕێگا و ڕە‌وتی هه‌نگاوه‌کانتان بگۆڕن

ئه‌م ڕێگایه ‌پێدا ده‌ڕۆن

زۆر کاروانی پێدا ڕۆیی و نه‌هاته‌وه

کاروان، کاروان…!

بۆ کوێ ئه‌ڕۆن؟!

ئه‌م هه‌ورازه‌ی وه‌ک مێرووله

پێدا ڕێچکه‌تان به‌ستووه

ده‌تانباته‌ هه‌ڵدێره‌که‌ی ساڵی پێشوو

ئه‌و بناره‌ش

وا به ‌ئێسک و کاسه‌ی سه‌رتان داپۆشراوه

ده‌گاته‌وه‌ به‌فره‌چاڵی کلیله‌ی ڕندوو

کاروان… کاروان!

ڕێگای تازه‌ بدۆزنه‌وه…

 

1369 – 1990

جەلال مەلەکشا - جلال ملکشا - Jalal Malaksha

دوایین نامه

 

 

دوایین نامه‌‌م

په‌ڵه‌هه‌ورێکی دڵته‌نگه

به ‌ئاخی دڵ ئاخنراوه!

وشه‌کانی

دڵۆپ دڵۆپ

به ‌خوێن، به ‌ئه‌سرین، نووسراوه!

کاتێ نامه ‌هه‌ورینه‌که‌م ده‌که‌یته‌وه

ئاگات لێ بێ

سینگ و به‌رۆکت ته‌ڕ نه‌بێ

هه‌ندێ وشه‌م

تینوون، تامه‌زرۆن، به‌دفه‌ڕن!

چمکی داوێنه‌که‌ت هه‌ڵکه

نه‌کا وشه‌ی خوێن سووری کا

ئاخر پۆلیس، ماوه‌یه‌که

بۆ قاتڵی من ده‌گه‌ڕن

 

زیندانی ورمێ

4/7/1371 – September 29, 1992

جەلال مەلەکشا - جلال ملکشا - Jalal Malaksha

من و تۆ

 

 

دوو هێڵی ته‌ریب

له‌ کام قۆناخی ده‌شتی ژیانا

ده‌ستی یه‌ک ده‌گرن؟

ئه‌ستێره ‌پۆل پۆل

له‌ ژوانگه‌ی سووری کازێوه ‌ده‌مرن

ناگه‌ن به‌ ڕۆژ و

به‌ پۆلووی کوانووی یه‌که‌م هه‌واری هه‌تاو

ده‌سووتن!

چاوه‌ڕوان مه‌به

من وه‌ک پاییز و

ڕووم له ‌زستانه

تۆیش به‌هارێکی

خونچه‌ی ژیانت به‌ره‌و پشکووتن!

 

5/6/1371 – August 27, 1992

جەلال مەلەکشا - جلال ملکشا - Jalal Malaksha

تاپۆی بوومه‌ڵێڵ

بۆ سواره

 

 

شه‌مێ باڵابه‌رز

گۆچانی تیشکی گرت به‌ ده‌سته‌وه

شه‌وی به‌زاند و

گڕی خسته‌ ناو شه‌وگاری نووته‌ک

له ‌نیڵه‌نیڵدا

هێنده‌ فرمێسکی ڕووناکی هه‌ڵڕشت

به‌لادا که‌ت و

نه‌گه‌یی به ‌هه‌تاو

وه‌ک تاپۆی ئاوات

له‌ بوومه‌ڵێڵدا

 

1372 – 1993

جەلال مەلەکشا - جلال ملکشا - Jalal Malaksha

گازنده ٢

 

 

دیسان کرمی بوختانکه‌ری نێو مۆبالی ده‌متان که‌وته ‌مه‌رگه‌نووزه

ئێوه‌ چین من بتاندوێنم

هێنده ‌چووکن

ته‌نانه‌ت به ‌مێرووله‌تان ناشوبهێنم

من شاعیری دڵی خۆمم

چیتان ده‌وێ به‌رماوخۆران

بۆ چه‌قۆتان هه‌ڵگرتووه

سینگی شیعره‌کانم بدڕن!

ئاگادار بن، له‌م بێشه‌دا شێر خه‌وتووه

که‌م وه‌ک داڵاش

به‌ سه‌ر جه‌سته‌ی ماندووی خه‌م‌ڕێژدا بفڕن

ئێوه‌ چین من بتاندوێنم

من دارێکی باڵابه‌رزم

گه‌رچی تووشی مه‌رگه‌ساتی وه‌رزی ڕە‌شم

به‌ڵام هه‌رگیز

سه‌رم بۆ چی دارکونکه‌ری دنیا هه‌یه ‌دانانه‌وێنم

وه‌کووو تانه‌ که‌وتوومه ‌سه‌ر گلێنه‌ی چاوتان

هات‌وچۆم وه‌ک خه‌نجه‌رێکه‌

ڕۆ ده‌چێته ‌نێو ده‌روون و قووڵایی هه‌ست و هه‌ناوتان!

ئێوه‌ چقڵن

سیله‌ی ڕێگه‌ی جێژوان ئه‌گرن

ئێوه ‌به‌کری مه‌رگه‌وه‌ڕن

هه‌ست و ڕۆحی ئه‌وینداران بریندار ئه‌که‌ن

بێژگه‌ خۆتان که‌س ناناسن

له ‌نێوانی گوڵ و دڵدا وه‌ک له‌مپه‌ڕن

من شاعیری دڵی خۆمم

من هه‌ر ئاواز بۆ خۆم و بۆ دڵداره‌که‌ی خۆم ئه‌خوێنم

مشتێ خاکی ده‌شتی عه‌شقم،

به‌ڵام له‌ ئاستی ئێوه‌دا

لووتکه‌م، لووتکه!

ئێوه‌ی ته‌ڵخه‌ک له ‌بنارما وه‌ک چه‌قۆی کول

بۆ ڕووخانی باڵای به‌رزم

به‌ردی خاراو هه‌ڵده‌کۆڵن

منی لووتکه‌ش پێده‌که‌نێم

هێنده ‌چووکه‌ن

حه‌یام ده‌چێ بتاندوێنم.

ته‌ماشا که‌ن…

وێڕای ده‌یان جار که‌وتن و هه‌ستانه‌وه

من هه‌ر خۆمم

وه‌ک جارانی خۆم ئه‌نوێنم

ئێوه‌ش هه‌ر خۆتان ئاسایی

وه‌کووو کرم، بێ‌ده‌ست و پا

ژلێوه‌تان دێ به ‌ناو یه‌کا

به‌ره‌و لووتکه‌ تف ئه‌که‌ن و جنێو ئه‌ده‌ن

منیش له‌ ئه‌و به‌رزانه‌وه

هه‌ر بورکان و بوومه‌له‌رزه‌ ده‌خولقێنم

هێنده ‌چووکه‌ن

حه‌یام ده‌چێ بتاندوێنم

چیتان ده‌وێ؟

بۆچی هێنده ‌ڕۆحی ماندووم ئازار ئه‌ده‌ن؟

نیگایه‌کی ڕۆحی پیسی خۆتان بکه‌ن

ده‌ردی من و ده‌ردی ئێوه ‌جیاوازه

شه‌رافه‌تی ده‌ردێکی خۆم

به ‌گشت ژین و ماڵ و حاڵتان ناگۆڕمه‌وه

ده‌ردی من، ده‌ردی ئینسانه

ده‌ردی ئێوه‌ش زۆر گه‌وره‌یه

به‌ڵام هه‌تا لای گونتانه!

قه‌ڵه‌مێکی تیژ و تووڕە‌م

خۆتان له‌ من بپارێزن

دێڕ به‌ دێڕی نامیلکه‌ی ژیانتان ده‌زانم

من وه‌ک ئێوه‌ خۆم له‌ پشتی ئاوێنه‌وه‌ ناشارمه‌وه

کانییه‌کی به‌ر تریفه‌ی مانگه‌شه‌وم

ساکار و ڕوون وه‌ک ئاسمانم

من گوڵێکم

بتانه‌وێ و نه‌تانه‌وێ

له‌م شۆره‌کاته‌ ڕواوم

ئێوه‌ی دڕکیش ڕق و کینه‌ی هه‌موو دنیآ کۆ که‌نه‌وه

دڵنیا بن… ده‌ستان ناگا

به ‌ترۆپکی به‌رزی ناوم!

ئێوه‌ چین من بتاندوێنم

من شاعیری دڵی خۆمم

من هه‌ر ئاواز بۆ خۆم و بۆ دڵداره‌که‌ی خۆم ده‌خوێنم.

 

6/7/1372 – September 27, 1993

جەلال مەلەکشا - جلال ملکشا - Jalal Malaksha