– سه‌فه‌رێکی نه‌هات –
سه‌فه‌رێکی نه‌هات
به‌ره‌و کوێستان ئه‌هاتمه‌وه
جانتام پڕ بوو له ئاوات و حه‌ز و تاسه
هێنده تینوو
هێنده تامه‌زرۆی دیدار بووم
ده‌مویست به‌فری ساڵی نه‌هات
بتوێنمه‌وه به هه‌ناسه!
بۆ لای کاڵێ ئه‌هاتمه‌وه
کاڵێ، عه‌شقی قه‌ڵای به‌رزی هه‌ست و
دڵی منیش،
کۆتره برجیله‌ی ماڵی بوو
کاڵێ ڕۆحی سه‌وزی ده‌شت و
چاوی گوند و
هێزی عه‌شق و
جوانتر له «عه‌نبه‌ر خاتوونی» «مه‌ولانا» و
گه‌وره‌تر له «خاتوو حه‌بیبه»ی دیوانی شیعری «نالی» بوو!
دێر هاتمه‌وه، دێر هاتمه‌وه!
کوێستان چۆڵ بوو…
چاوی ئاسمان، ڵێڵ ئه‌یڕوانی
جێژوانه‌که‌ی جاران بۆنی
خه‌مێکی زه‌ردی لێ ئه‌هات!
پڕ له چقڵ و خاک و خۆڵ بوو!
ئیتر دنیا ڕە‌ش ئه‌نوێنێ
له ناو دڵما که‌وی ته‌نیای شیعر
دڵته‌نگ دڵته‌نگ،
دڵته‌نگتر له کوێستان
سیاوچه‌مانه‌ی فرمێسک و خوێن ئه‌چریکێنێ.
8/5/1369 – July 30, 1990
جەلال مەلەکشا - جلال ملکشا - Jalal Malaksha
