دۆزه‌خ

 

 

له‌ ناو گڕ و کڵپه‌ی ئازاری ئه‌م دۆزه‌خه‌دا

ده‌سووتێم و هه‌ڵده‌قرچێم

ڕۆژێ هه‌زار که‌ڕە‌ت ده‌مرم!

به‌ڵام هه‌رگیز ناتوانم، نا…

به‌جێ بێڵم

ئه‌و به‌هه‌شته ‌شاد و سه‌ربه‌سته‌ بۆ ئێوه ‌و…

به‌کامتان بێ…

من ته‌نیا هه‌ر له‌م دۆزه‌خه

هه‌ست به‌بوونی خۆم ده‌که‌م و ئارام ده‌گرم!

 

4/1379 – july, 2000

جەلال مەلەکشا - جلال ملکشا - Jalal Malaksha

دوا ڕۆژانی سه‌ده‌ی بيست

 

 

ئێمه‌ خێڵی چه‌واشه‌ی نێو مێژووی دڵی خۆمانين و

چاومان تا سه‌ر کڵاوه‌ی لووتمان هه‌ته‌ر ناکا

هێشتا بيرمان کرچ و کاڵه!

هێشتا خه‌نجه‌ر

ئه‌ندێشه‌مان سه‌ر ئه‌بڕێت و

هێشتا تفه‌نگ،

فه‌رهه‌نگێکه ‌تاڵ و تووڕە

به‌ سه‌ر ژيانمانا زاڵه!

تفه‌نگ نه‌بێ لاڵ و کوێرين

له ‌هه‌وراز و له‌ نشێودا

تفه‌نگ گۆچانی ده‌ستمانه!

به‌ زمانی تفه‌نگ ده‌دوێين

له‌ جاسووسه‌ی تفه‌نگه‌وه

چاومان بۆ دنيا ئه‌ڕوانێ

ته‌نيا تفه‌نگ، تفه‌نگ، تفه‌نگ مه‌به‌ستمانه!

 

له ‌به‌رانبه‌ر دوژمن مه‌ردين

پۆڵاين، به‌ردين!

سه‌رمان له‌ حاستی گه‌ردووندا، دانانه‌وێ

هه‌مبه‌ر، قه‌نديل و هه‌ڵگوردين!

له ‌هه‌ڵمه‌تا، شێرين، په‌ڵه‌نگين، نه‌به‌ردين!

به‌ڵام ڕێگا باش ناناسين، زوو ئه‌خڵه‌تين!

سه‌دان که‌ڕە‌ت

نه‌وت و خوێن له‌ شاری که‌رکووک ئاوێته‌ بوو

سنه ‌سووتا

دياربه‌کر، له ‌ئاگری داخا هه‌ڵگيرسا

گردی سه‌يوانی سلێمانی خه‌ڵتان خوێن بوو

هه‌زار قازی

له ‌چوارچرای مه‌هابادا

له ‌دار درا…

به‌ڵام هيچمان به‌هيچ نه‌بوو!

 

کاتێ هه‌ستاين

کاتێ ويستمان ده‌نگ هه‌ڵبڕين

زه‌خم و زووخی مێژينه‌مان

به ‌گوێی جيهانا ده‌ربڕين

هه‌موو به‌يه‌ک ڕێگا بڕۆين

تفه‌نگ بۆمان بوو به ‌مه‌به‌ست!

ئامانج دزرا و ڕێگا ون بوو…

هه‌رکه ‌سازی خۆی گرته‌ده‌ست!

يه‌کێ چوو بۆ باوه‌ش دوژمن

تووره‌که‌ی جاشی کرده‌ سه‌ر

له‌م‌لايشه‌وه

بۆ چۆن مردن، گيان به‌خت کردن

بێگانه‌ بوو به‌ ڕاوێژکه‌ر!

ته‌ماشا که‌ن

ته‌ماشای ده‌ورو به‌رتان که‌ن

هه‌ر قۆناخێ پێداويستی خۆی گه‌ره‌که!

ئێستا، بير و مێشک و ئه‌ندێشه ‌پێويسته

به ‌جێی تفه‌نگ

به‌ چاوی خۆمان بڕوانين

به ‌هێزی مێشک و ئه‌ندێشه

بارودۆخی ژين بگۆڕين

ته‌ماشا که‌ن

دوا ڕۆژانی سه‌ده‌ی بيسته!

 

14/1/1370 – April 3, 1991

جەلال مەلەکشا - جلال ملکشا - Jalal Malaksha

چریکەی نێو قەفەز

 

 

ھەموو شەوێ

لە ئەودیوی دیوارەوە

باڵندەیەک، دیلی قەفەز

تێی دەچریکاند.

بەستەکانی، ڕووداوانی نیشتمان بوون

لاوک، حەیران، سیاوچەمانەی ئەکرد بە پرد

ھەڵگورد دەستی شاھۆی ئەگرت

لە گەڵ قەندیل

بۆ لای چیای ئاگری ئەچوون!

ھەموو شەوێ

منیش لە پشت دەلاقەی ژوورەکەمەوە

زنجیری دیلیم دەپساند و

ئەسپی خەیاڵم زین ئەکرد

بە شاڕێگەی حەنجەرەی ئەو باڵندەدا

 

بۆ نیشتمان ئەچوومەوە!

دوێنێ شەوێ

شەو بۆنی خەم، بۆنی ماتەمی لێ ئەھات

تا بەیانی چاوەڕوان بووم

دەنگی باڵندەکە نەھات!

ئەوڕۆ بیستم،

لە کازێوەی بەیانیدا

باڵندە دەنگ خۆشەکەیان سەر بڕیوە

بۆ تێکدانی بنکەی سووری بەستەکانی

ڕەگ بە ڕەگی حەنجەرەیان ھەڵدڕیوە!

ئێمشەو دڵم، دەکورکێنێ

باڵندەیەک، باڵ و پەل و پۆ خوێناوی

لە سەر لقی شیعرێ ھێشتا نەگوتراوم

ھەڵنیشتووە و دەچریکێنێ!

 

٢٤/٣/١٣٧١ – June 14, 1992

جەلال مەلەکشا - جلال ملکشا - Jalal Malaksha

نوێژ

 

 

ڕووگەی جێژوان، چاوەڕوانە!

من لە ئێرە دەس‌نوێژەکەم ھەڵگرتووە!

دەمەوێ چوار ڕەکات ئەوین،

لە میحرابی چاوەکانتا بخوێنمەوە!

کات درەنگە،

دڵ ھەڵپەیە بۆ میعراجێ!

عیشا بە سەر شان و ملما، بڵاو بووە!

سەرم بچێ، نوێژم ناچێ!

 

٥/٣/١٣٧١ – May 26, 1992

جەلال مەلەکشا - جلال ملکشا - Jalal Malaksha