لەم جیھانە،

‌پەلەوەریش

نیشتمانی بۆ خۆی ھەیە

دارستانێ، تاقەدارێ

ئاوارەش بێ

نێو ئەشکەوتێ، بن پاسارێ!

چۆن شێت نەبم، نەچم بەگژ کوێستانێکا و

چوارڕێیانی گەردوون نەگرم

ھێشتا بستێ خاک شک نابەم

تیا بژیم، تیا بمرم!

چۆن شێت نەبم

ھەموو ڕێگام لێ بەسراوە

بە ‌ھەر جادە و شەقامێکا ڕادەبوورم

تەپۆڵکەیەک

کڵاوێکی سەربازانەی لە ‌سەر ناوە

دڵ و گیرفان دەپشکنێ

بەڵگەی خوایشم لەگەڵدا بێ

ڕێگام دەگرێ

نەکا نەخشەی وڵاتێکم لە گیرفان و

ڕەمزی نھێنی ناوێکم لە ‌دڵدا بێ!

چۆن شێت نەبم

تووڕەم، تووڕە…

وەک ئاگرم

شمشێرێکی ھەڵکێشراوم

لە ‌ناو بریسکەی خوێنی خۆما ئەزریکێنم

ھەتا کالان نەدۆزمەوە

‌ئۆقرە ‌ناگرم!

خوا ئەزانێ

من حەز ناکەم، وەک ئەشقیا

سەرگەردان بم لەم کوێستانە

ڕێگام بدەن بێمە ‌خوارێ

ھیچم ناوێ لەم جیھانە

جگە ‌نەختێ سەربەستی و

بستێ خاک و

ئاڵایەک و

ڕەشماڵێکی قەرەجانە!

جەلال مەلەکشا | تووڕەیی

جەلال مەلەکشا - جلال ملکشا - Jalal Malaksha - Celal Melekşa

ڕێبوار

 

 

ڕێبوارێکم

به ‌قه‌د مێژوو وه‌رز و ساڵ و سه‌ده‌م دیوه

به ‌قه‌د مێژوو

چقڵی ڕێگام له‌نێو سینگ و دڵ چه‌قیوه‌!

به ‌قه‌د مێژوو

دێوه‌زمه‌ی به ‌سامی ڕێگا

له ‌ئاسمانی چاوه‌کانما

ئه‌ستێره‌ی گه‌شی چنیوه

به ‌قه‌د مێژوو

فرمێسکی چاوم سڕیوه!

ڕێبوارێکی چه‌واشه‌م و

خۆم نازانم بۆ کوێ ئه‌چم

تاریکه‌شه‌وی نووته‌که ‌و

ئه‌ستێره‌یه‌ک پێناکه‌نێ

هه‌ر لاقێکم به ‌لایێکا هه‌نگاو ئه‌نێ!

ده‌ستی ڕاست و ده‌ستی چه‌پم

به‌ قه‌د مه‌ودای سنووره‌کان له ‌یه‌ک دوورن!

جه‌سته‌یه‌کی بریندارم…

زامه‌کانم قووڵ و به‌تره‌ف و ناسۆرن

وه‌ک خه‌مێکی مێژینه‌م و

له ‌ناو کڵپه‌ی ئاگردانی ئه‌وینێکا هه‌ڵقرچاوم

وه‌ک ئاخێکی دووکه‌ڵاویم

هه‌ڵمی ناخێکی خنکاوم!

من ڕێبواری مێژووی تاڵی دڵی خۆمم!

هه‌ر ئه‌ڕۆم و هه‌ر ئه‌ڕۆم و هه‌ر جێماوم!

هاوار ئه‌که‌م!

ئه‌م ڕێگایه ‌نابڕێته‌وه

تا پێ به‌ شوێن یه‌کا نه‌چن

دڵ و گوڵی له‌ یه‌ک بڕاو ده‌ست له ‌ملی یه‌کتر نه‌که‌ن

ده‌ستی ڕاست و ده‌ستی چه‌پم به‌ یه‌ک نه‌گه‌ن

تا له ‌ژوانی ئه‌وینێکا په‌یمان تازه‌ نه‌کرێته‌وه

ئه‌م ڕێگایه ‌نابڕێته‌وه

نابڕێته‌وه!

جەلال مەلەکشا - جلال ملکشا - Jalal Malaksha

ئیعدامی

 

 

له ‌گۆڕە‌پانی شارێکا

جه‌لاده‌کان، داریان هه‌ڵخست

جاڕیان کێشا

ئه‌وه‌ی ویستیان…

به ‌ته‌شییه‌ کۆنه‌که‌ی خۆیان

بۆ خه‌ڵکیان ڕست

وتیان: تاوانی ئیعدامی

گه‌چڵاندنی خه‌وی شاره‌

سزای ئه‌وه‌ش له ‌قانوونی ئه‌ساسیدا

بۆ چاوترسێن خه‌ڵکی، داره!

وتیان: تاوانی ئیعدامی

ورووژانی بورکانه ‌دامرکاوه‌کان

بۆ ته‌کان و بوومه‌له‌رزه ‌و ئاژاوه‌یه

هێنانه‌وه‌ی ده‌نگی کوێستان

بۆ شڵه‌ژانی ئاسایشی ئه‌م وڵاته ‌ڕازاوه‌یه!

نیوه‌شه‌و بوو…

له ‌قاوشی زیندانێکا

ئیعدامییه‌ تاوانباره‌که

بیری له ‌کازێوه ‌ئه‌کرد

له ‌ژوورێکی پڕ خه‌یاڵی شاری خه‌ما

ژنێ بیره‌وه‌رییه‌کانی

ده‌نک ده‌نک

وه‌ک ملوانک،

بۆ گه‌ردنی کۆرپه‌ی هێشتا نه‌هاتووه‌که‌ی پێوه ‌ئه‌کرد!

له ‌گۆڕە‌پانی سامناکا

سه‌گ و پۆلیس ئه‌یانلووراند

له ‌ژووری دادگای شارا

کاربه‌ده‌ستان بۆ ئیعدامی

خه‌ڵاتیی مه‌رگیان ئه‌دووراند.

کاتژمێره‌ فێگرتووه‌که‌ی

کاکه‌ی تاوانباریش به‌له‌ز

شه‌وی ئه‌شکان

هاتن، هاتن…

قازی، مه‌لا، پۆلیس و میرغه‌زه‌ب هاتن

وتیان: هانێ! ئه‌وه ‌پێنووس

وه‌سییه‌تنامه‌که‌ت بنووسه‌

وتی: ده‌بێ سڵاو بنێرم بۆ کوێستان

وتیان: نابێ…

ئه‌ویش له‌ وه‌سییه‌تنامه‌دا

تفه‌نگه‌که‌ی دا به ‌سبه‌ی

داره‌که‌یان له‌ خه‌و هه‌ڵسان

وه‌نه‌وزی گۆڕه‌پان شکا

له ‌ژووری چۆڵ

تکێ فرمێسک

به ‌سه‌ر گۆنای ژنی ژانگرتوودا تکا!

ئاڵقه‌ی ته‌ناف زریکاندی

تاوانبار چوو به‌ره‌و ئاسمان

هه‌وره‌کانی کوێستان جمان

ژنی ژانگرتوو قیژاندی

کۆرپه‌ی سبه‌ی هاته‌ جیهان

جەلال مەلەکشا - جلال ملکشا - Jalal Malaksha

سه‌رئه‌نجام؟

 

 

پرسیار، پرسیار…

تا چاو بڕ کات

خاڵ به‌ خاڵی ڕێگه ‌هه‌موو

هه‌ر پرسیاره

من ڕێبوارێکم ئه‌ناسی

به‌درێژایی ڕێگه‌ ته‌نانه‌ت نه‌یتوانی

له ‌سێبه‌ری وڵامێکدا

نه‌ختێ ماندوویی خۆی ده‌رکا

سه‌رئه‌نجام له ‌ڕێگه، عاسی

خۆی به ‌ئا‌ڵقه‌ی پرسیارێکه‌وه‌ هه‌ڵواسی.

جەلال مەلەکشا - جلال ملکشا - Jalal Malaksha

من تاسەیەکی ئاوارەم
ھەر ئەڕۆم و
ڕێگا لەناو تەم و مژدا ونم دەکا!
ھەر ئەڕۆم و
ھەنگاوە ‌فێگرتووەکانم
بەرەو نامۆی دوورم دەبا!
من دڵداری دەریایەکم
بە شەپۆلە ‌یاخیەکانی
تینوویەتی ھەموو وەرزە ‌نامۆییەکانم بشکێنێ
چەپکە ‌گڕێکی دوورکەوتووی کڵپەی عەشقم
لرفە ئەکەم بەرەو ئاسمان
بەو ئاواتەی بمباتەوە ‌بۆ ئاگردان!
گەردەلوولێ
نەرمەشنەی بای ئەوینێ!…
بێ‌قەرارم
نەھەنگێکی تووڕە لە نێو گۆمی خوێنما ئەنرکێنێ
گیانم ھەڵمەت بۆ مەرگ ئەبات
زۆر ھەوڵ ئەدەم
ڕەمزی ئەوین لەنێو دڵما بشارمەوە
نەکا لەپڕ ئەوین‌کوژێ
شوێن پێی ئاسکی سڵی دەشتی خەیاڵ ھەڵکات!
خامەی یاخی ئوقرە ‌ناگرێ
ڕازەکانم ئەدرکێنێ
وەک مۆم لە نێو ئاگردانی ئەوینێکا ھەڵکورماوم!
تۆ دەریامی
منیش زامێکی ناسۆرم
تینووی قومێ، تنۆکەیێ
چ
ۆ
ڕ
ێ
ئاوم!

جەلال مەلەکشا | بێ‌قەرار

جەلال مەلەکشا - جلال ملکشا - Jalal Malaksha - Celal Melekşa