ئه‌گه‌ر هاتی
نازانم چۆن بپه‌ڕمه‌وه
شه‌وه‌زه‌نگه
بوار نییه
تا چاو بڕ کا، له هه‌ر لاوه
هه‌ر هه‌ڵدێر و داره‌به‌نه
ڕێگا به‌رته‌سک و باریکه!
ئه‌گه‌ر هاتی،
له‌گه‌ڵ خۆتا
چه‌ند هێشوه ئه‌ستێره بهێنه
لێره شه‌وه و
ئاسمان هه‌میشه تاریکه!
هه‌ولێر
18/9/1379 – May 7, 2000
جەلال مەلەکشا - جلال ملکشا - Jalal Malaksha
هه‌زار و دووهه‌مین چیرۆکی شه‌هرزاد
تۆ لێره چی ده‌که‌ی؟
ئه‌ی ڕۆحی ئاواره و
غه‌ریب‌تر له دیجله؟!
به سواری گژه‌بای دڕی کام کاره‌سات
هاتیت و له به‌غدا دابه‌زیت؟
گوێ بگره…
له‌وبه‌ری دیجله‌وه
له دارولخه‌لافه
شریخه‌ی شه‌لاخ و هه‌ڕە‌شه‌ی مردنه
ده‌زانم
هه‌زار و دووهه‌مین چیرۆکی شه‌هرزاد
چیرۆکی ئه‌وینی که‌سێکه
که خولیای عه‌شقێکی ئاورین
سه‌ری پێ هه‌ڵگرت و
قه‌راخی دیجله‌ی کرد به ژوانگه‌ی فرمێسک و ته‌نیایی
چیرۆکی ئه‌وینی که‌سێکه
ته‌ک «ئه‌بوونه‌واس»ی سه‌وداسه‌ر
له خه‌ڵوه‌ی شه‌وانی به‌غدادا
شه‌رابی ده‌رد و ژان ئه‌نۆشن
کاتێکیش سه‌رخۆش بوون
له خه‌می غوربه‌ت و فیراق و ته‌نیایی
هێند ده‌گرین، هێند ده‌گرین
ده‌بن به شه‌پۆل و
ده‌ده‌ن له ڕووبار و
ئاوێته‌ی ئاو ده‌بن!
به‌غدا
1380 – 2001
جەلال مەلەکشا - جلال ملکشا - Jalal Malaksha
بانگت ده‌که‌م
بانگت ده‌که‌م
ده‌م پڕ ده‌بێ
له شیله‌ی گوڵ!
ئه‌وین هه‌تاوێکی گه‌رمه
هه‌نییه‌ی ته‌نیاییم ماچ ئه‌کا!
بانگم ده‌که‌ی
ئاسمان ده‌بێ
به چارشێوی گوڵئه‌ستێره و
دارستانی کپی ژینم
پڕ ده‌بێ له چریکه‌ی بولبول
18/2/1379 – May 7, 2000
جەلال مەلەکشا - جلال ملکشا - Jalal Malaksha
ڕێگه‌ی دژوار
من فریشته‌یه‌ک ده‌ناسم
له دوڕگه‌ی ژان و ئازاردا
دڵۆپ دڵۆپ
فرمێسک ده‌کا به ملوانک
بۆ گه‌رده‌نی ئاواتێکی باڵابه‌رز و
خۆی له گڕی ئه‌وینێکی ئاوریندا ده‌توێته‌وه
فریشته‌که‌م!
نه‌مگوت خۆت له‌م گڕستانه بپارێزه؟
نه‌مگوت ئه‌م ڕێگه دژواره
بست به بستی، دڕکه، گوڵمێخه، بزماره!
نه‌مگوت لێره،
زه‌وی سه‌خت و
ئاسمان قه‌ڵه‌مڕە‌وی داڵه
نه‌مگوت شیعر
گه‌رووی هه‌سانی چه‌قۆیه!
ئازای ئه‌ندامی زاماره؟!
فریشته‌که‌م
منیش ڕێبواری ئه‌م ڕێگه بزمارڕێژەم
هه‌ر ئه‌ڕۆم و چقڵ، سینگی هه‌ستم ده‌دڕێ،
هه‌زار هه‌زار چه‌قۆی ده‌مه‌زه‌ردی سیخوڕ
شوێنی هه‌نگاوم هه‌ڵده‌گرێ
هانێ ده‌ستم!
وه‌ره با پێکه‌وه بڕۆین
ڕه‌نگه له‌پشت تراویلکه‌ی ئه‌م ژیانه پڕ له زامه
ئارام بگرین!
یان له گه‌رمه‌ی ڕووداوێکدا
وه‌ک دوو باڵنده‌ی نافه‌رمان
دژی ڕکه‌ی خواوه‌نده‌کانی سه‌ره‌ڕۆی ئه‌م زه‌وینه
یاخی له یاسای ئاسمان
به بڵێسه و گڕی شیعری خۆمان بمرین
1380 – 2001
جەلال مەلەکشا - جلال ملکشا - Jalal Malaksha
حه‌سره‌ت
من بیر له‌و به‌هاره ڕەنگینه ده‌که‌مه‌وه
هات و تێپه‌ڕی و
ئێمه نه‌مانتوانی
بۆن به گوڵێکیه‌وه بکه‌ین!
بۆنی خوێن، مه‌ستی کردبووین و
خوێنی یه‌کترمان
له په‌رداخی فیشه‌کدا فڕ ده‌کرد!
من بیر له‌و به‌هاره ڕەنگینه ده‌که‌مه‌وه و
نه‌فره‌ت ده‌که‌م له‌وانه‌ی
ده‌رکه‌کانیان داخست و نه‌یانهێشت
بۆن به‌گوڵێکیه‌وه بکه‌ین!
ده‌یان سه‌ده
چاوه‌ڕوانی ئه‌و به‌هاره بووین
که هات ئێمه پشتمان تێکرد و
به‌رامبه‌ری یه‌کتر ڕاوه‌ستاین و
له زستانی ڕق و قینا
ڕە‌ق بووینه‌وه
ئاخ، مخابن!
ده‌مانبه‌نه‌وه سه‌ره‌تای ڕێگا
نه‌وه‌کانمان هه‌میسان
بۆ گه‌یشتن به ئێستا
به ده‌م ڕێگاوه شه‌که‌ت و ماندوو
کارنامه‌کانمان ده‌خوێننه‌وه و
تف و له‌عنه‌ت له گۆڕەکانمان ده‌که‌ن
ئه‌ی مێژوو!
له‌بیرت بێ، به‌هار هات و
ده ساڵ، ده‌ساڵی ڕە‌به‌ق
له به‌رامبه‌ر ده‌رکه‌کانمانه‌وه ڕاوه‌ستا و پاڕایه‌وه
ئێمه ده‌رکه‌مان بۆ نه‌کرده‌وه و
له سه‌ر مێزی مه‌یخانه‌‌ی خه‌یانه‌ت و حه‌ماقه‌ت
خوێنی یه‌کترمان
له په‌رداخی فیشه‌کدا، فڕ ده‌کرد
ئه‌ی مێژوو…
له‌بیرت بێ، ده‌یان سه‌ده
به ئاواتی گه‌یشتن به ئه‌م به‌هاره جوانه‌مه‌رگه!
پێکه‌وه رێگامان بڕی
له هه‌ر هه‌نگاوێکدا،
هه‌زاران گیانی نه‌سره‌وتمان به خاک ئه‌سپارد
کاتێکیش گه‌یشتین
به‌هار، به هه‌زاران گوڵخه‌نده‌وه
باوه‌شی بۆ کردینه‌وه
به‌ڵام، ئێمه پشتمان لێکرد و
له زستانی ڕق و قینا
ڕه‌ق بووینه‌وه!
هه‌ولێر
8/7/1379 – September 29, 2000
جەلال مەلەکشا - جلال ملکشا - Jalal Malaksha
دڵخۆشی
کڵاوم لاره!
قه‌ڵه‌مه‌که‌م…
له به‌رامبه‌ر چی سوڵتان و
فه‌رمانڕە‌وا و داگیرکه‌ره
کڕنۆش نابات!
هیچیش وه‌ک ئه‌و
تفه‌نگه ده‌م به‌هاواره
وا له په‌نای قه‌ڵه‌مێکدا
له‌سه‌ر پێیه…
منی ئه‌وینداری وڵات
دڵخۆش ناکات!
هه‌ولێر
1378 – 2000
جەلال مەلەکشا - جلال ملکشا - Jalal Malaksha
بریا
بریا من وه‌کوو په‌پووله بایام
ده‌م له ناو ده‌می گوڵێکی سووردا
سه‌رمه‌ست له شیله‌ی ئه‌وین ده‌مردم!
کیژۆڵه‌یه‌کی شۆخ و نازه‌نین
له نێو ده‌فته‌ری بیره‌وەریدا
ویشکی ده‌کردم!
به‌غدا
1378 – 2000
جەلال مەلەکشا - جلال ملکشا - Jalal Malaksha
ڕۆژژمێر
خه‌ریکه ڕێ ته‌واو ده‌بێ
زۆربه‌ی زۆرم لێ بڕیوه
ڕۆژژمێری سه‌ر مێزه‌که‌م
هه‌تا دێ که‌م ده‌بێته‌وه
په‌نجا په‌ڕە‌م لێ دڕیوه
هاکا وتیان
ئه‌سپه سه‌رشێته‌که‌ی زه‌مان
“جه‌لال مه‌له‌کشا”یشی گلان.
1380 – 2001
جەلال مەلەکشا - جلال ملکشا - Jalal Malaksha
دۆزه‌خ
له ناو گڕ و کڵپه‌ی ئازاری ئه‌م دۆزه‌خه‌دا
ده‌سووتێم و هه‌ڵده‌قرچێم
ڕۆژێ هه‌زار که‌ڕە‌ت ده‌مرم!
به‌ڵام هه‌رگیز ناتوانم، نا…
به‌جێ بێڵم
ئه‌و به‌هه‌شته شاد و سه‌ربه‌سته بۆ ئێوه و…
به‌کامتان بێ…
من ته‌نیا هه‌ر له‌م دۆزه‌خه
هه‌ست به‌بوونی خۆم ده‌که‌م و ئارام ده‌گرم!
4/1379 – july, 2000
جەلال مەلەکشا - جلال ملکشا - Jalal Malaksha
گوڵ خه‌نده‌ران
دره‌ختی هه‌وره‌کان ده‌شه‌کێنێته‌وه!
چاوی هیچ شاخه‌یه‌ک ناترووکێ
داره‌کان گشت قسرن!
خێڵی هه‌نگ
خوویان به شه‌کر و میو گرتووه.
له مێژە ئاوباره‌ی ئه‌وینی دار و گوڵ
به‌یه‌کتر ناگه‌یه‌نن
زه‌ڕگه‌ته، خوار و ژوور
چوارده‌وری ژوانگه‌یان ته‌نیوه
ڕە‌شه‌با کۆچی به عه‌شیره‌ی په‌پووله کردووه!
هه‌یاران!
سیاساڵ و باران؟!
دره‌ختی خه‌مه‌کان ده‌شه‌کێنێته‌وه!
په‌ڕوپۆی په‌پووله ده‌بارێ
شه‌ق ده‌بێ دڵی گوڵ خه‌نده‌ران!
29/9/1379 – December 19, 2000
جەلال مەلەکشا - جلال ملکشا - Jalal Malaksha