– شیعری لاسار –
شیعری لاسار
دیوارێکیان به‌ده‌ور شیعره‌کانما کێشا و
په‌رژینیان کرد…
ئه‌ودیویان لێ پاوان کردم…
له‌م‌دیو دیوار
تابلۆی ژنێکیان هه‌ڵواسی
وتیان فه‌رموو
ئه‌وه باخی سینگ و مه‌مک
ئه‌وه نازی چاوی جوان و
شه‌کری لێو و
باڵای سه‌رو و
ئه‌مه‌ش قه‌ڵه‌م!
تا ئه‌توانی
تا هێزی هه‌ستت بڕ ئه‌کا، پێیا بێژە
وشه‌کانت
له قاڵبی قاچ و قول و سمت و که‌مه‌ریا داڕێژە!
شیعرێکم هه‌ر له سه‌ره‌تای سه‌رهه‌ڵدانیا
بزۆز و شێت و لاسار بوو
به گژ داروبه‌ردا ئه‌چوو…
هه‌ڵده‌به‌زی
بۆ ئه‌ودیوی دیواره‌که سه‌ری ئه‌برد
له ئاکامدا…
بڕیاری دا،
شووره‌ی ده‌ستکرد بڕووخێنێ…
نهێنی و ڕازی ئه‌ودیو، دیواره‌که بدرکێنێ.
به قاڵدرمه‌ی وشه‌کانا،
هه‌رکه گه‌یشته سه‌ر دیوار
خێرا هاتن، به‌ده‌ست‌وبرد
پێی و ده‌ست و ده‌میان به‌ست و…
ئاگریان دا و…
جه‌سته‌یان به خۆڵه‌مێش کرد!
جەلال مەلەکشا - جلال ملکشا - Jalal Malaksha