– شیعری یاخی –
شیعری یاخی
له‌و ڕۆ‌ژە‌وه
شیعره‌کانم
ئاڵای ئاژاوه‌یان هه‌ڵدا
هه‌زار هه‌زار چه‌قۆی سیخوڕ
وێڵن به شوێن شاعیرێکا
وا داگیرسا و
گڕی له گیانی شه‌و به‌ردا
1360 – 1981
جەلال مەلەکشا - جلال ملکشا - Jalal Malaksha
بابەتەکان
– شیعری تازه –
شیعری تازه
کۆڕەکانی هۆ‌لاکۆخان
کاتێ به سه‌ر شیعره‌کانما
نه‌وتیان پژاند
بوو به جێژنی وشه‌کوژان!
ماری قا‌مچی ده‌می نابووه کانیی خوێنم
که‌ڵبه‌ی که‌له‌بچه وه‌ک چه‌قه‌ڵ
ده‌ستی هونه‌رمی، ئه‌کرۆژا
شقارته‌یان دا‌گیرساند و
بوو به قاقا و چه‌پڵه‌ڕێزان
هاوارم کرد:
من شاعیری چه‌وساوانم
هه‌زار کوانووی پڕ له ئاگر
شیعره‌کانم ناسووتێنێ
گۆمی گه‌نده‌ڵ که‌ی ئه‌توانێ
چیای هاوار له ناو خۆیا بخنکێنێ
هه‌ر له‌وکاتا شیعره‌کانم
له ناو گڕدا هه‌ڵئه‌قرچان
ده‌ستی مێشکم
له ناو هێڵی تووڕە‌ی دڵما
وشه‌ی شیعری تازه‌ی ئه‌چان
1360 – 1981
جەلال مەلەکشا - جلال ملکشا - Jalal Malaksha
– شیعر –
شیعر
شیعر که هات
دڵیش ئیتر
ئۆقره ناگرێ، ئه‌یدرکێنێ
پۆلیس بۆنی پێوه ده‌کا
بۆنی ئازادی لێوه بێ
هه‌ر ده‌ست‌به‌جێ
به ته‌نافی شۆڕی قانوون
ئه‌یخنکێنێ
1365 – 1986
جەلال مەلەکشا - جلال ملکشا - Jalal Malaksha
– کارته‌پۆستاڵ –
کارته‌پۆستاڵ
هه‌ڤاڵه‌کان!
وتم پیرۆزباییتان لێ بکه‌م
به‌هار دێت و
شیعرێک تازه بهۆنمه‌وه
بۆ کوردستان!
وتم به جوانترین وشه
نه‌ورۆز بکه‌م به ملوانک
بۆ گه‌ردنی به‌رزی کوێستان!
زۆر هه‌وڵم دا
بۆتان بڵێم شیعرێکی ته‌ڕ
هه‌زار وشه‌م ڕست کرد و هه‌ر
نه‌هاته به‌ر!
په‌نام برده به‌ر پیكاسۆ
گرینیکای بۆم ڕە‌سم کرد و وتی هانێ
وتم لۆرکا ئه‌ی تۆ، وتی:
شیعره‌کانم
له‌کاستیلا به‌جێ ماون
ڕێگا ناده‌ن گورگه‌کانی
وتم به هایکۆی ژاپۆنی
ئه‌رکی شانم به‌جێ بێنم
هێرۆشیما گڕی گرت و
وشه‌ی هایکۆ بوو به فرمێسک
ڕژایه نێو گۆمی خوێنم!
هه‌ڤاڵه‌کان!
ڕاسته به‌هار جوان و شه‌نگه
نه‌ورۆز جێژنی تایبه‌تی گه‌لی کورده
لێم ببوورن
پیرۆزباییتان لێ ناکه‌م
چون ناوێرم
به‌ڵام کارته‌پۆستاڵێکی هه‌ڵه‌بجه‌تان بۆ ده‌نێرم.
28/12/1367 – March 18, 1989
جەلال مەلەکشا - جلال ملکشا - Jalal Malaksha
– چاوی گورگ –
چاوی گورگ
که خۆم ناسی
دنیا شه‌و بوو
شه‌وێکی چڕ، تاریک تاریک!
تيشکێکي دوور
له ئه‌وپه‌ڕی ئاسۆی دووری ژیانمه‌وه
وه‌کوو مه‌شخه‌ڵ داگیرسابوو
به‌ڵام ڕێگا
پڕ له کۆسپ و که‌نده‌ڵان بوو
ئاسته‌نگێکی دوور و باریک!
تیشکی هیوا گرشه‌ی ئه‌هات
بۆ لای خۆی بانگی ئه‌کردم
ڕایده‌کێشام!
هێزی ئه‌دا به‌هه‌نگاوم
بیر و ئه‌ندێشه‌ی ئه‌بردم!
ساڵه‌های ساڵ
به قه‌د ساڵه‌کانی عومرم، ڕێگام بڕی
گۆچانی ئاسنم شکاند
سه‌د پێڵاوی پۆڵام دڕی
هه‌ر هه‌نگاوێ زامێکی قووڵ
ڕێگا هه‌موو ژان و بڕک بوو
هێزی هیوا به‌ره‌و ئامانجی ئه‌بردم
گه‌یشتم و دڵ پڕ له حه‌ز، ئاوات، تاسه…
ماندوو، بێ هێز،
ئه‌ژنۆ شکاو
ئامێزم بۆ تیشک کرده‌وه
به‌ڵام ئه‌فسووس، ئه‌فسووس، ئه‌فسووس
ئه‌و مه‌شخه‌ڵه چاوی گورگ بوو!!
1367 – 1988
جەلال مەلەکشا - جلال ملکشا - Jalal Malaksha
– گازنده –
گازنده
لێتان تووڕە‌م
له‌گه‌ڵتانا
یه‌کڕە‌نگ ژیام
به‌شادیتان شاد ئه‌بووم و
له ماته‌متانا ئه‌گریام!
به‌ڵام کاتێ
قوڵپه‌ی گریان
ئه‌وکی هه‌نسکی پێگرتم
ئێوه‌کردتان به شایلۆغان
ئێستاش دڵه ساکاره‌که‌م نه‌گۆڕاوه!
هه‌ر وه‌ک دڵه‌که‌ی جارانه
هه‌ر چه‌ند تووڕە‌م
پڕ له خۆشه‌ویستیتانه.
1366 – 1987
جەلال مەلەکشا - جلال ملکشا - Jalal Malaksha
– گله‌یی –
گله‌یی
شیعره‌کانم
بوون به گوڵ و
که‌نیشکه‌کانی ئه‌م شاره
چه‌پک چه‌پک
کردیان به هه‌دیه‌ی دڵداری
به‌ڵام هه‌رگیز کچێ نه‌هات
بڵێ جه‌لال:
ئه‌ی خۆت بۆ هێنده خه‌مباری؟!
1367 – 1988
جەلال مەلەکشا - جلال ملکشا - Jalal Malaksha
– شه‌‌هید –
شه‌‌هید
کۆترێ سپی،
نامه‌ی ئاشتی،
وڵاتێکی زامداری بۆ مێژوو ئه‌برد.
ڕاوچی هاتن
دێو جامه‌یان بۆ ڕاگرت و
ده‌سڕێژیان کرد.
له‌پڕ زه‌وی زریکاندی
ئاسمان له خه‌و ڕاچڵه‌کا
خوێنی کۆتر
دڵۆپ
دڵۆپ
به‌سه‌ر هه‌موو دنیا تکا!
1368 – 1989
جەلال مەلەکشا - جلال ملکشا - Jalal Malaksha
– ئاواتێک –
ئاواتێک…
ئاخۆ ده‌بێ،
ئه‌و ڕۆژە بێ
کاوه‌ی کوڕم
جانتای سه‌فه‌ر کاته شانی؟
ده‌ڵاڵانی به‌ر گاراژی شاری سنه،
هاوار بکه‌ن:
سلێمانی، سلێمانی!
1359 – 1980
جەلال مەلەکشا - جلال ملکشا - Jalal Malaksha
– په‌ڵه‌نگ و مانگ –
په‌ڵه‌نگ و مانگ
په‌ڵه‌نگ له سه‌ر چیای ئاوات
له‌گه‌ڵ تریفه‌ی مانگه‌شه‌وا
یاری ئه‌کرد!
دنیا پڕ بوو له خه‌یاڵ و حه‌ز و تاسه
گوڕتاوی شه‌م بۆ په‌پووله
سرته‌ی ماسی له‌گه‌ڵ ڕووبار
خورپه‌ی دڵی گوڵه‌باخ و
چرپه‌ی پای هه‌نگ.
له‌ناکاوا…
هه‌ڵزنایه باڵای چیا
شریخه‌ی تفه‌نگ
ڕوخساری مانگ هه‌ڵپڕووکا
له ئامێزی سووری چیا
بوو به ئاسۆی هاواری خوێن
گڵکۆی په‌ڵه‌نگ.
1366 – 1987
جەلال مەلەکشا - جلال ملکشا - Jalal Malaksha