کوردستانم بۆ بێنەوە

 

 

… کە خۆم ناسی،

وتم: دایە!

من کێم و چیم؟

خەڵکی کام شار،

کام مەڵبەندی ڕووی سەر زەویم؟

 

وتی: ڕۆڵە…

تۆ کوردی و دیل و هەژار

نیشتمانت کوردستانە

بەڵام ناوی نیشتمانت،

لە سەر نەخشەی جیهان نییە

بێ‌نیشانە!!

 

وتم: دایە!

باوکم کوانێ؟

بۆچی هەرگیز دەستی حەزی نەگوشیوم؟

بە کام تاوان

من هەتیوم؟!

 

وتی: ڕۆڵە!

ڕۆژێ کاتێ داگیرکەران

شاریان سووتان

تفەنگی مافی کردە شان

ڕووی کردە ئاسۆی سەربەستی

لێزمەی خوێنی گەشی لەشی

بە سەر لێوی خاکا پژان!

 

وتم: دایە!

ئەی براکەم؟

 

شەپۆلی خەم

ئاوی ماتەم

گۆمی چاوی پڕ کرد لە ئەستێرەی فرمێسک!

وتی: ڕۆڵە!

لە کازێوەی وەرزی رەشا

لاشەیان کردە نیشانە

خەونەکانی ئازادی ئەم کوردستانەی

بردە ژێر خاک

گیانی پاکی کردە فیدای

سەربەستی ئەو نیشتمانە!

 

وتم: دایە!

ئەی من چی بکەم؟

 

هەستا سەرپێی

تفەنگێکی بڕنەوکورتی بزمارڕێژی دایە دەستم

وتی: ڕۆڵە!

ئەی هۆی ئاوات و مەبەستم

دەیان ساڵە لە چوار لاوە

کوردستان وەک پاڵەوانێ

لە قەڵای دێوی داگیرکەر

دەست و پێی زنجیر کراوە

ڕێبازی خوێن بگرە و بڕۆ

دۆعای گەلی چەوساوەی کورد لەپشتی تۆ

سنوورەکان بشێوێنە

سیمای ونبووی خۆت لە نێو مێژووی کۆنا بدۆزەوە

کوردستانم بۆ بێنەوە

با بە دەوریا بسووڕمەوە

کوردستانم بۆ بێنەوە

با دانیشم لەتە لەتە

وڵاتەکەم بدوورمەوە!

 

1360 – 1981

جەلال مەلەکشا - جلال ملکشا - Jalal Malaksha