کوڕی شاخ

 

 

تیژ و تووڕه

وه‌ک خه‌نجه‌ر بوو

هه‌تا نه‌مرد

له‌ به‌رامبه‌ر ئاسمانه‌وه‌

سه‌ری به‌رزی نه‌وی نه‌کرد!

هێنده ‌تامه‌زرۆی ژیان بوو

به ‌ناو دڵی مه‌رگا ئه‌چوو!

کاتێ ناویت لێ ئه‌پرسی

سه‌ری شه‌رمی دائه‌خست و

ئه‌یوت یاخیم

کوڕی شاخم

قه‌قنه‌سی ناو خۆڵه‌مێشی

دیرۆکی سووتاوی کوردم!

چۆڕاوه‌ی زامێکی قووڵم

داخم، ده‌ردم، سۆزم، ئاخم!

وشه‌ی سه‌رۆک

وه‌ک دڕک بوو!

هه‌ستی پاکی بریندار ئه‌کرد.

زگی سه‌رۆک

مه‌شکه‌یه‌کی پڕ له ‌درۆ

پڕ له فێڵ و پڕ له ‌فیز و پڕ له ‌با بوو

شڵقه‌ی ئه‌هات

عه‌قڵی پیاوی ساویلکه‌ی لە خشته ‌ئه‌برد!

ئه‌م وه‌ک خه‌نجه‌ر

ئه‌چه‌قیه‌ ناو

ته‌ک و پووز و سینگیانه‌وه!

کاتێ قسه‌ی قۆڕیان ئه‌کرد

هه‌روه‌ک دووپشک

ئه‌یدا به‌ ناو زاریانه‌وه!

گیرفانیانی ده‌پشکنی

ڕازه‌کانیانی ئه‌درکاند

وه‌ک تانه ‌بوو

به ‌سه‌ر گلێنه‌ی چاویانه‌وه!

کاتێ کوژرا

بوو به ‌شه‌هید!!

خوێنی بوو به ‌ده‌ریای مه‌نگ و

ئێستا سه‌رۆک

له‌ که‌ناری ده‌ریای خوێن و

له ‌ژێر سایه‌ی ناوی ئه‌وا

عومری خۆیان به ‌سه‌ر ئه‌به‌ن!

کێلی به‌رزی گۆڕەکه‌یشی

سه‌نگه‌رێکه

سه‌رۆکه ‌شۆڕشگێڕە‌کان

له‌ پشتیه‌وه

به‌ره‌و ڕووی خه‌ڵک

ده‌سڕێژ ئه‌که‌ن!

 

ورمێ

1370 – 1991

جەلال مەلەکشا - جلال ملکشا - Jalal Malaksha