– ڕاز –
ڕاز
دایه چۆن بوو…
له ڕازه‌که‌ی دوێنێ شه‌وتا
کێ هات، کێ چوو؟
دایکم بێ‌ده‌نگ
دۆش‌دامابوو!
کاره‌ساتێک هێدی هێدی
ئه‌هات چاوی گه‌شی ئاسمان بشڵه‌قێنێ!
له شاقه‌ڵی چیای خه‌ما
بزماری خه‌و
پێڵووی به سه‌ر گلێنه‌ی چاوی ماندووی گوندا
ته‌قه‌ڵ دابوو!
دایه چۆن بوو…
له ڕازه‌که‌ی دوێنێ شه‌وتا
کێ هات، کێ چوو؟
دایکم بۆ ئاسمان ئه‌یڕوانی
هه‌ورێکی ڕە‌ش، به پێدزکێ
خه‌نجه‌ر به‌ده‌ست
شوێنی مانگه زه‌رده‌ڵه‌که‌ی ئاسمانی گوندی هه‌ڵئه‌گرت
تا گه‌یشتنه دوندی چیا…
دایه چۆن بوو…
ئاخری نه‌تگوت
پاڵه‌وانی چیرۆک چۆن مرد؟
هه‌ور نیشته سه‌ر سینگی مانگ و
دایکم له‌پڕ زریکاندی
هاوار، هاوار،
سه‌ری بڕی!
له پشت زریوه‌ی فرمێسکه‌وه
دیتم که هه‌ور،
خوێنی مانگی
به خاولیه چڵکنه‌که‌ی
له ده‌م و چاو خه‌نجه‌ر ئه‌سڕی!
1369 – 1990
جەلال مەلەکشا - جلال ملکشا - Jalal Malaksha