من دڵداری کوردستانم

 

 

سنووره‌کان بشێوێنن

من تامه‌زرۆی بۆن و تامی نیشتمانم

چۆن هه‌نگ شه‌یدای گوڵه‌باخه‌

من دڵداری کوردستانم!

 

من ئه‌زانم

به‌فر بۆ خوێن،

چۆن باوه‌شی ئه‌کاته‌وه…

دار به‌ڕووه‌کان به‌کام تاوان ئه‌سووتێنن.

 

من ئه‌زانم،

مرۆڤ له‌گه‌ڵ بیری مه‌رگا چلۆن ئه‌ژی

په‌ڵه‌نگ ئاوی ڕق و کینه‌

له‌کام کانی ئه‌خواته‌وه!

 

من ئه‌زانم

تینووه‌کان چۆن

مه‌مکی چیا ئه‌چه‌کێنن

کوێستان چۆن خوێن له‌ ڕوخساری ئه‌سڕێته‌وه

دڵداره‌کان،

به‌ کام وشه ‌دێنه ‌به‌یان

تفه‌نگ به‌ کام ده‌نگ و زمان

سیاوچه‌مانه‌ی کورده‌واری ئه‌چڕێته‌وه!

 

من دڵداری کوردستانم!

من ئه‌مه‌وێ

له ‌شه‌قامه ‌قۆرخه‌کانی دیاربه‌کرا

شمشاڵ لێده‌م،

قام و حه‌یران بخوێنمه‌وه.

له‌ چوارچرای مه‌هابادا

هه‌ڵکه‌م ئاڵاکه‌ی کوردستان

له‌ قامیشلی هاوار که‌م و

له‌گه‌ڵ چینی کرێکارا شاری که‌رکووک،

به ‌مان گرتن بژوێنمه‌وه‌!

 

سنووره‌کان بشێوێنن

کورد بنه‌ڕە‌تی جیهانی ناو

خۆی له‌ چینی دیواره‌کاندا پڕووکا

بوو به‌خوێن و

د

ڵ

ۆ

پ

 

د

ڵ

ۆ

پ

به‌سه‌ر هه‌موو دنیا تکا!

 

من دڵداری کوردستانم

وڵاته‌که‌م پێده‌نه‌وه

نه‌خشه‌ی جیهان بخوێنن و…

سنووره‌کان شی که‌نه‌وه!

 

22/11/1358 – February 11, 1980

جەلال مەلەکشا - جلال ملکشا - Jalal Malaksha