بابەتەکان

جەلال مەلەكشا | Jalal Malaksha | جلال ملکشا

– تەنیایی –

تەنیایی

 

 

شەو خەریکە

بە چارشێوە ڕەشەکەی، شار دادەپۆشێ

ڕیشۆڵەکان لە سەر لق و پۆپی داری قەراخ شەقام

ئارام دەگرن

ڕێبوارەکان پەلەیانە

ھەر ھەنگاوێک بەلەز بەرەو ماڵی دەکشێ.

دەست بۆ مل و

چاو بۆ دیدار، ھەڵپەیانە…

یەکتر دەچڕن.

ھەر من تەنیا

بێکەس، غەریب

وەک باڵندەی بێ‌ھێلانە

بە‌بێ ئامانج شەقام دەبڕم

شار خەوتووە

شەقام چۆڵە…

ھەر من تەنیا… سەرگەردانم.

دڵتەنگ، دڵتەنگ

لە چاوی خەم، فرمێسک ئەسڕم!

 

٢٨/١/١٣٧٥ – April 16, 1996

جەلال مەلەکشا - جلال ملکشا - Jalal Malaksha