بابەتەکان

جەلال مەلەكشا | Jalal Malaksha | جلال ملکشا

– ته‌نیایی –

ته‌نیایی

 

 

له ‌ئاسمان له‌عنه‌ت و ڕقی خوا ده‌بارێ

له ‌زه‌وی دووپشک و مار ده‌ڕوێ

داڵده‌یه‌ک شک نابه‌م

جگه‌ ناو خه‌ڵوه‌تی ڕۆحی خۆم!

من ماران‌گه‌سته‌م و

ته‌وقێکی غه‌زه‌بم

له ‌ئاده‌م به ‌میرات ماوه!

هه‌ست ده‌که‌م

له ‌جنسی ئه‌م خاک و خه‌ڵکه ‌نیم

زمانی باڵنده ‌و دار و به‌رد ده‌زانم

به‌ڵام که‌س له‌ زمانی من ناگات

گه‌یشتوومه‌ ته‌نیایی جیهان و

ته‌نیایی خۆم به ‌جێ هێشتووه!

له‌ودیوی ئه‌م ژووره ‌تاریک و ته‌نگه‌وه

مارێکی قه‌ترانی، پاپۆکه‌ی به‌ستووه

ژنان هه‌ر نه‌مامی داره‌ سێو ده‌چێنن

ئاده‌م له ‌نێوانی به‌هه‌شت و دۆزه‌خدا دڕدۆنگه

ئه‌هریمه‌ن شکۆفه‌ی سێوی بۆ ده‌هاوێ

قابیل یه‌ک له‌ دوای یه‌ک

هه‌ر ته‌رم ده‌نێژێ!

ئێمه‌گشت

له‌ نوتفه‌ی قابیلین!

تاوانی ئاده‌م و فریوی شه‌یتان و

شه‌هوه‌تی حه‌وامان له‌ کۆڵه

ده‌عبایه‌ک ده‌روونم ده‌کۆڵێ

ده‌نگی پێی ده‌بیسم

خرته‌خرت، خه‌ریکه

مێشک ده‌جوێ، دڵ ده‌خوات

هه‌ر نزیک ده‌بێت و نزیکتر

نازانم له ‌رۆحی خۆمه‌وه

‌په‌نا بۆ کوێ ببه‌م

وه‌حشه‌ت له‌ ژیانم، په‌نجه‌ی هه‌ڵپێکاوه

داڵده‌یه‌ک شک نابه‌م

له‌ ئاسمان له‌عنه‌ت و له ‌زه‌وی مار ده‌ڕوێ.

 

12/3/1387 – June 1, 2008

جەلال مەلەکشا - جلال ملکشا - Jalal Malaksha
جەلال مەلەكشا | Jalal Malaksha | جلال ملکشا

– ته‌نیایی –

ته‌نیایی

 

 

ئه‌م سه‌رده‌مه

چه‌رخی ده‌رده

سه‌ده‌ی ته‌نیایی ئینسانه

له ‌پانتایی ئه‌م که‌ویره ‌پان و پۆڕە

تۆ ئه‌و ئاسکه‌ سه‌رگه‌ردانه‌ی

خێڵی ڕاوچی

له‌ سه‌ر چاره‌نووست ده‌دوێن.

بڕیار ده‌ده‌ن

بازنه‌ی گه‌مارۆ کات‌به‌کات

ته‌نگتر ده‌بێ

له ‌هه‌ر لاوه‌ ده‌سڕێژ ده‌که‌ن!

تۆ نازانی له‌ کام لاوه

له ‌دۆزه‌خی ته‌نیاییدا

لاشه‌ت دابێژدابێژ ده‌که‌ن

 

1376 – 1997

جەلال مەلەکشا - جلال ملکشا - Jalal Malaksha